پێشانگەیەکی هونەریی منداڵان لە نێوەندی خێزانی هایدێک بەڕێوەچوو

ڕێکەوتی ٢٧ی تەمووزی ٢٠٢٦ لە نێوەندی خێزانی هایدێک پێشانگەی هونەریی منداڵان "هەمووان لەژێر یەک ئاسماندا" کرایەوە. لە دوای چەندین مانگ چالاکیی داهێنەرانە، نێوەندی خێزان دەرگەی خۆی بە ڕووی خێزان، دراوسێ و میوانەکاندا کردەوە. منداڵان، دایکان و باوکان، بەساڵاچوان، داپیر و باپیرەکان سەردانی پێشانگەکەیان کرد.

لە پێشانگەکەدا ئەو کارە هەمەڕەنگانە پیشاندران کە لە ماوەی ڕابردوودا لە لایەن منداڵان و خێزانەکان لە نێوەندی خێزان دروست کراون. تابلۆ ڕەنگینەکان لەسەر کانفاس، وێنە، نیگار، خشڵ، ملوانکە، دەستبەند، جانتا و ئەو کارتانەی بە دەست دروستکرابوون نمایش کران.

پێشانگەکەمان بە بەشداریی هاوکارەکانمان دەوڵەمەندتر بوو. شیلان ڕەشید کارە داهێنەرانەکانی پێشکەش کرد، نیگار خشڵەکانی وەک ملوانکە و دەستبەندی پیشان دان کە بە دەست دروستی کردوون، لاڤان جانتاکانی خۆی پیشان دا کە بەئارامگری دروستی کردوون. کارەکان لە لایەن سەردانکەرانەوە پێشوازییەکی گەرمییان لێ کرا. ئەمەش ئاماژەیە بۆ وزەی داهێنەرانە لەنێو خێزانەکانی گەڕەکەکە.

ئەو بەرهەمانەی پیشان دران، لە کاری هونەریی سادە واوەتر بوون. بەرهەمەکان چیرۆکی ساتە هاوبەشەکان، ئارامگری، پشتگیریی یەکتر و بەرەوپێشچوونی کەسەکی دەگێڕنەوە. ئەمانە بەرهەمی چەندین گرووپی داهێنەرن کە تێیاندا منداڵان لەگەڵ دایک و باوک یان خزمەکانیان کار لەسەر هونەرەکانیان دەکەن. ئەم چالاکییە مەودایەکی ئارامی بۆ ئاڵوگۆڕ و گوزارشت لەخۆکردن دروست کرد. لە ڕێی بۆیاخکردن، دیزاینکردن، دروون و هونەری دەستی، دەکرێت هەستەکان دەرببڕدرێن، باوەڕبەخۆبوون بەهێز بکرێت و پەیوەندی نوێ بونیاد بنرێن.

ئەم بەرنامە بە تایبەت بۆ ئەو خێزانانەی پاشخانی فەرهەنگیی جیاوازیان هەیە، زۆر واتادارە. ئەوان نەک هەر پەرە بە داهێنان دەدەن، لە هەمان کاتدا پەیوەستبوون و ئاسوودەیی ڕۆحی بەهێز دەکەن. پێکەوە کارکردن ساتی ئارام دروست دەکات، پەیوەندییەکان لەنێو خێزانەکاندا بەرەوپێش دەبات، دیداری نێوان ئەو مرۆڤانەی کە لەوانەیە هەرگیز یەکتریان نەبینێت، ئاسانتر دەکات. بەم شێوەیە هونەر دەبێتە شێوەیەک لە بەشداریی جڤاکی و هەستیاری.

بەدەم خواردنەوە و کۆبوونەوەیەکی هێژا، میوانەکانمان دەرفەتیان بۆ ڕەخسا تا پێکەوە قسە بکەن، ئەزموونەکان ئاڵوگۆڕ بکەن و کاری منداڵان و خێزانەکان هەڵسەنگێنن. ئەمە ساتێکی پڕ لە شانازی بوو بۆ هونەرمەندە جەوانەکان تا کاری خۆیان لە پێشانگەکەدا پیشان بدەن و پێزانینی میوانەکان تاقی بکەنەوە.

پێشانگەی هونەریی منداڵان "هەمووان لەژێر یەک ئاسماندا" بوو بە ئەنجامێکی سەرنجڕاکێش بۆ بەرنامەی هاوینەمان. بەڕوونی نیشانی دا کە ئافراندن مرۆڤەکان پێکەوە پەیوەست دەکات و نەوەکان کۆدەکاتەوە، نێوەندی خێزانی هایدێک-یش شوێنێکی وەهایە کە جڤات، فرەڕەنگیی فەرهەنگی و ڕێزلەیەکترگرتن لەخۆ دەگرێت.